ICC પ્લેયર ઓફ ધ મન્થની શોર્ટલિસ્ટ જાહેર, આ ભારતીય ખેલાડીને મળ્યું સ્થાન

ઈન્ટરનેશનલ ક્રિકેટ કાઉન્સિલ એટલે કે આઈસીસીએ પ્લેયર ઓફ ધ મંથ એવોર્ડ માટે શોર્ટલિસ્ટ કરાયેલા ત્રણ ખેલાડીઓના નામ જાહેર કર્યા છે. મંગળવારે, 7 નવેમ્બરના રોજ, ICCએ આ એવોર્ડ માટે ત્રણ ખેલાડીઓની પસંદગી કરી, જેમાં એક ઝડપી બોલર, એક વિકેટકીપર બેટ્સમેન અને એક ઓલરાઉન્ડરનો સમાવેશ થાય છે. આ યાદીમાં એક ભારતીય ખેલાડીને પણ સ્થાન મળ્યું છે, જે છે ઝડપી બોલર જસપ્રિત બુમરાહ, જેણે ઓક્ટોબર મહિનામાં પોતાની બોલિંગથી અજાયબીઓ કરી છે.

જસપ્રિત બુમરાહ ઉપરાંત ઓક્ટોબર 2023 માટે શોર્ટલિસ્ટ કરાયેલા ખેલાડીઓમાં દક્ષિણ આફ્રિકાના વિકેટકીપર બેટ્સમેન ક્વિન્ટન ડી કોક અને ન્યૂઝીલેન્ડના ઓલરાઉન્ડર રચિન રવિન્દ્રનો સમાવેશ થાય છે. આ ત્રણેય ખેલાડીઓએ વર્લ્ડ કપ 2023માં તબાહી મચાવી છે. બુમરાહે બોલ, ડી કોકે બેટ અને રવીન્દ્રએ બેટ અને બોલથી તબાહી મચાવી છે. વિમેન્સ પ્લેયર ઓફ ધ મન્થમાં વેસ્ટ ઈન્ડિઝની હેલી મેથ્યુસ, બાંગ્લાદેશની નાહિદા અખ્તર અને ન્યુઝીલેન્ડની એમેલિયા કેરનો સમાવેશ થાય છે.

ક્વિન્ટન ડી કોકની વાત કરીએ તો તેણે ગયા મહિને વર્લ્ડ કપમાં 3 સદી ફટકારી હતી. તેણે ઓક્ટોબરમાં ટીમ માટે 431 રન બનાવ્યા હતા. તે જ મહિનામાં તેણે વિકેટકીપર તરીકે 10 કેચ અને એક સ્ટમ્પિંગ કર્યું હતું. ઓક્ટોબરમાં વર્લ્ડ કપમાં તે શ્રીલંકા, ઓસ્ટ્રેલિયા અને બાંગ્લાદેશ સામે સદી ફટકારવામાં સફળ રહ્યો હતો.

રચિન રવિન્દ્રની વાત કરીએ તો તેણે પોતાના પહેલા વર્લ્ડ કપમાં જ પોતાનું વલણ બતાવ્યું હતું. તેણે ઓક્ટોબર દરમિયાન ટૂર્નામેન્ટની કિવિઝની પ્રથમ છ મેચોમાં 81.20ની સરેરાશથી કુલ 406 રન બનાવ્યા છે. જેમાં ઈંગ્લેન્ડ અને ઓસ્ટ્રેલિયા વિરુદ્ધ બે સદીનો પણ સમાવેશ થાય છે. તેણે 3 વિકેટ પણ લીધી છે.

જ્યારે જસપ્રીત બુમરાહની વાત કરીએ તો તેણે વર્લ્ડ કપ 2023ની પ્રથમ અડધો ડઝન મેચોમાં ટીમ ઈન્ડિયા માટે 14 વિકેટ ઝડપી છે. તેનો ઈકોનોમી રેટ 4 રન પ્રતિ ઓવર કરતા ઓછો છે. આ કારણે તે આ મહિને પ્લેયર ઓફ ધ મંથનો એવોર્ડ મેળવવાનો દાવેદાર છે. તેણે બેટથી કેટલાક રન પણ બનાવ્યા છે.