ભારતની સૈન્ય શક્તિઓથી પ્રભાવિત થઈને ફિલિપાઈન્સે બ્રહ્મોસ સુપરસોનિક ક્રૂઝ મિસાઈલ ખરીદવાની ઈચ્છા વ્યક્ત કરી હતી. હવે ભારત તરફથી બ્રહ્મોસ મિસાઈલનું પ્રથમ કન્સાઈનમેન્ટ ફિલિપાઈન્સને સોંપવામાં આવ્યું છે. સમાચાર એજન્સી ANI અનુસાર, આ હથિયાર સિસ્ટમની સપ્લાય માટે દક્ષિણ-પૂર્વ એશિયાઈ દેશ ફિલિપાઈન્સ સાથે યુએસ $375 મિલિયનના કરાર પર હસ્તાક્ષર થયાના બે વર્ષ બાદ આ સપ્લાય થવા જઈ રહી છે. ANI દ્વારા ટ્વીટ કરાયેલી તસવીરો અનુસાર ભારતીય વાયુસેનાનું એક મિલિટરી ટ્રાન્સપોર્ટ એરક્રાફ્ટ ફિલિપાઈન નેવીને સોંપવા માટે મિસાઈલો અને લોન્ચર્સ સાથે રવાના કરવામાં આવ્યું છે. ભારતે જાન્યુઆરી 2022માં ફિલિપાઈન્સ સાથે મિસાઈલની ત્રણ બેટરીની સપ્લાય માટે કરાર પર હસ્તાક્ષર કર્યા હતા. ફિલિપાઈન્સ પહેલો દેશ છે જેને ભારતે અત્યાધુનિક બ્રહ્મોસ મિસાઈલની સપ્લાય કરી છે.
ફિલિપાઈન્સમાં આવતા સપ્તાહ સુધીમાં આ સિસ્ટમ સક્રિય થઈ જશે
આ ડીલ જાન્યુઆરી 2022માં થઈ હતી. આ ડીલ સાથે ભારતે પોતાને સંરક્ષણ ક્ષેત્રમાં એક મોટા નિકાસકાર તરીકે રજૂ કર્યું છે. ભારત અને રશિયા દ્વારા વિકસિત બ્રહ્મોસ મિસાઈલ માટે આ પ્રથમ નિકાસ ઓર્ડર છે. એક રિપોર્ટ અનુસાર, બ્રહ્મોસ મિસાઈલ શુક્રવારે ફિલિપાઈન્સમાં પહોંચી જશે, પરંતુ તેની આખી સિસ્ટમ આવતા સપ્તાહ સુધી સક્રિય થઈ શકે છે.
ભારતે 2024-25 સુધીમાં 35,000 કરોડ રૂપિયાની સંરક્ષણ નિકાસનું લક્ષ્ય નક્કી કર્યું છે. સંરક્ષણ મંત્રાલયે 1 એપ્રિલના રોજ કહ્યું હતું કે ભારતની સંરક્ષણ નિકાસ ગયા નાણાકીય વર્ષમાં 32.5% વધી છે અને પ્રથમ વખત રૂ. 21,000 કરોડને પાર કરી ગઈ છે. ભારત હવે તેની સેનાને આત્મનિર્ભર બનાવવાની સાથે સાથે સૈન્ય નિકાસને પ્રોત્સાહન આપવા પર ધ્યાન કેન્દ્રિત કરી રહ્યું છે. ભારત હાલમાં લગભગ 85 દેશોમાં મિલિટરી હાર્ડવેરની નિકાસ કરી રહ્યું છે, જેમાં લગભગ 100 સ્થાનિક કંપનીઓનો સમાવેશ થાય છે. તેમાં મિસાઇલો, આર્ટિલરી, રોકેટ, બખ્તરબંધ વાહનો, ઓફશોર પેટ્રોલિંગ વેસલ્સ, વ્યક્તિગત રક્ષણાત્મક ગિયર, વિવિધ પ્રકારના રડાર, સર્વેલન્સ સિસ્ટમ્સ અને દારૂગોળો સામેલ છે.
દક્ષિણ ચીન સાગરમાં સતત તણાવ વધી રહ્યો છે
ફિલિપાઈન્સ એવા સમયે મિસાઈલ સિસ્ટમની ડિલિવરી લઈ રહ્યું છે જ્યારે દક્ષિણ ચીન સાગરમાં વારંવાર થતી અથડામણને કારણે તેની અને ચીન વચ્ચે તણાવ વધી રહ્યો છે. બ્રહ્મોસ મિસાઇલ સિસ્ટમની ત્રણ બેટરી ફિલિપાઇન્સ દ્વારા તેના દરિયાકાંઠાના વિસ્તારોમાં તૈનાત કરવામાં આવશે જેથી આ ક્ષેત્રમાં કોઈપણ ખતરો સામે રક્ષણ મળે. બ્રહ્મોસ મિસાઇલ સિસ્ટમ સુપરસોનિક (ધ્વનિની ગતિ કરતાં વધુ ઝડપી) ઝડપે ચોકસાઈ સાથે વિસ્તૃત રેન્જમાંથી જમીન અથવા દરિયાઈ લક્ષ્યાંકો પર પ્રહાર કરવામાં સક્ષમ છે. ભારત-રશિયાનું સંયુક્ત સાહસ ‘બ્રહ્મોસ એરોસ્પેસ પ્રાઈવેટ લિમિટેડ’ સુપરસોનિક ક્રૂઝ મિસાઈલ બનાવે છે જેને સબમરીન, જહાજો, એરક્રાફ્ટ અથવા જમીન પરથી લક્ષ્યો તરફ ફાયર કરી શકાય છે. બ્રહ્મોસ મિસાઇલ 2.8 મેકની ઝડપે લક્ષ્ય તરફ આગળ વધે છે, એટલે કે અવાજની ગતિથી લગભગ ત્રણ ગણી ઝડપે.