ગુજરાતના સાબરકાંઠા જિલ્લાના વડાલી તાલુકામાં ગુરુવારે એક ઘરમાં વિસ્ફોટકથી ભરેલું સ્પીકર ફાટતાં એક વ્યક્તિ અને તેની પુત્રીનું મોત થયું હતું અને બે બાળકો ગંભીર રીતે ઘાયલ થયા હતા. આ મામલે પોલીસે એક વ્યક્તિની અટકાયત કરી છે. ધરપકડ કરાયેલા પુરુષની પત્નીના મૃતક સાથે કથિત રીતે ગેરકાયદેસર સંબંધો હતા. મૃતકોની ઓળખ જીતુ ઉર્ફે જીતેન્દ્ર વણજારા (36) અને ભૂમિકા વણજારા (14) તરીકે થઈ છે, જેઓ વેડા ગામના રહેવાસી છે. પોલીસે જણાવ્યું હતું કે વિસ્ફોટ સ્થળ પરથી એમોનિયમ નાઈટ્રેટ સહિત વિસ્ફોટક સામગ્રી મળી આવી હતી.
ધ ઈન્ડિયન એક્સપ્રેસે અહેવાલ આપ્યો છે કે આ ઘટના બાદ, સરકારે નેશનલ સિક્યુરિટી ગાર્ડ (NSG)ની ટીમને ઘટનાની તપાસ માટે સ્થળ પર મોકલી હતી. વડાપ્રધાન નરેન્દ્ર મોદીએ જિલ્લામાં એક રેલીને સંબોધિત કર્યાના એક દિવસ બાદ આ વિસ્ફોટ થયો હતો.
સાબરકાંઠા જિલ્લા પોલીસના જણાવ્યા અનુસાર, ગુરુવારે બપોરે 12.30 વાગ્યાની આસપાસ એક ઓટોરિક્ષા ચાલક જીતુના ઘરે પહોંચ્યો અને પાર્સલ પહોંચાડ્યું. આ પાર્સલ પર ‘જિતેન્દ્ર વણઝારા’ નામનું સ્ટીકર હતું, જેમાં તેનું સરનામું અને મોબાઈલ ફોન નંબર પણ હતો.
પોલીસ મહાનિરીક્ષક (ગાંધીનગર રેન્જ) વીરેન્દ્ર સિંહ યાદવે જણાવ્યું કે જીતુએ તેની પુત્રીઓ ભૂમિકા અને છાયા તેમજ પાડોશી છોકરી શિલ્પા (14)ની હાજરીમાં તે પાર્સલ બોક્સ ખોલવાનું શરૂ કર્યું. ત્યારબાદ તે બોક્સમાં જોરદાર વિસ્ફોટ થયો, જેના કારણે ચારેય લોકો ઘાયલ થયા. પાડોશીઓ દ્વારા તેમને વડાલીના સામુહિક આરોગ્ય કેન્દ્રમાં લઈ જવામાં આવ્યા હતા. જીતુ અને ભૂમિકાને તબીબોએ મૃત જાહેર કર્યા હતા જ્યારે છાયા અને શિલ્પાને સારવાર માટે હિંમતનગર સિવિલ હોસ્પિટલમાં રીફર કરાયા હતા.
તપાસ દરમિયાન પોલીસને ખબર પડી કે જીતુને પડોશી ગામની એક પરિણીત મહિલા સાથે અફેર હતું. મહિલાના પતિએ જીતુને તેની પત્નીથી દૂર રહેવાની ચેતવણી પણ આપી હતી. મહિલાનો આરોપી પતિ એક માઈનિંગ કંપનીમાં કામ કરે છે અને કોઈક રીતે તે એમોનિયમ નાઈટ્રેટ મેળવવામાં સફળ રહ્યો. તેણે મ્યુઝિક સિસ્ટમના સ્પીકર્સ એમોનિયમ નાઈટ્રેટથી ભર્યા અને તેને ડિટોનેટર સાથે જોડી દીધા. જીતુએ પાર્સલ ખોલતાની સાથે જ સ્પીકર ફાટ્યું.
પોલીસે જણાવ્યું કે મહિલાના પતિ અને ઓટોરિક્ષા ચાલકની અટકાયત કરવામાં આવી છે. આરોપીઓએ જીતુના ઘરે પાર્સલ પહોંચાડવા માટે વેડા ગામના રહેવાસી ઓટો ચાલકને 200 રૂપિયા આપ્યા હતા. એક અધિકારીએ કહ્યું કે અમે બંને આરોપીઓ વિરુદ્ધ ગુનો નોંધવાની પ્રક્રિયામાં છીએ.
ગાંધીનગરની ફોરેન્સિક ટીમ અને ગુજરાતની આતંકવાદ વિરોધી ટુકડીના વડા સુનિલ જોષી અને સાબરકાંઠા જિલ્લાના પોલીસ અધિક્ષક વિજય પટેલે પણ ક્રાઈમ સ્પોટની મુલાકાત લીધી હતી. સિવિલ હોસ્પિટલના આસિસ્ટન્ટ રેસિડેન્ટ મેડિકલ ઓફિસર વિપુલ જાનીએ જણાવ્યું હતું કે ઘાયલ યુવતીઓમાંથી એકને વેન્ટિલેટર પર રાખવામાં આવી છે.