વડોદરા કોર્પોરેશન દ્વારા કરાતી પ્રિ મોનસુન કામગીરીની પોલ પહેલા વરસાદમાં જ ખુલી ગઈ

વડોદરા મ્યુનિસિપલ કોર્પોરેશન દ્વારા હાલમાં પ્રિમોન્સૂનની કામગીરી કરવામાં આવી રહી છે. તેમાં વરસાદી ગટરો, વરસાદી કાંસ, તળાવો, મેન હોલ, કેચપીટ વગેરેની સફાઈ થઈ રહી છે. પ્રિમોન્સૂન સફાઈ કામગીરી સંદર્ભે કોર્પોરેશનમાં સમીક્ષા બેઠક પણ યોજાઈ હતી. કોર્પોરેશન દ્વારા 90% થી વધુ કામગીરી થઈ ગઈ હોવાની વાત કરવામાં આવી રહી છે. બીજી બાજુ શહેરના તમામ તળાવની સફાઈ પાંચ જૂન સુધીમાં પૂર્ણ કરવા, વરસાદી કાંસો પહોળી કરી અવરોધો હટાવી તેની સફાઈ કરવા, શહેરના પૂર્વ વિસ્તારમાં દર ચોમાસામાં હાઇવે તરફથી વધારાનું જે પાણી આવે છે અને જળબંબાકારની પરિસ્થિતિ સર્જાય છે તે સમસ્યા ન થાય તે માટે જરૂરી કાર્યવાહી કરવા પણ સૂચના અપાય છે. આ ઉપરાંત જે વિસ્તારોમાં વરસાદી પાણી ભરાય છે, ત્યાં પાણીનો નિકાલ કરવા માટે પંપો મુકવા, કઈ કઈ જગ્યાએ પંપો મૂકવાના થશે તેની યાદી તૈયાર કરવી વગેરે આયોજનને ઓપ આપવામાં આવી રહ્યો છે. જે મકાન જર્જરીત હાલતમાં છે અને વરસાદ દરમિયાન તૂટી પડે તેવી હાલતમાં છે, આવા મકાનોને પણ નીચે ઉતારી લેવા નોટિસો આપવામાં આવી છે. બીજી બાજુ વિરોધ પક્ષ કોંગ્રેસનું કહેવું છે કે કોર્પોરેશન દર વર્ષે ચોમાસા પહેલા પ્રિમોનસુન કામગીરી અંગે મોટા દાવાઓ કરે છે, પરંતુ પહેલા વરસાદમાં જ પોલ ખુલી જાય છે.